يا روح قلبي… قصيد في الشعر المحكي بقلم الشاعرة حسناء حفظوني من تونس.

يا روح قلبي يا حبيب عمري الغالي
يلي غيرك في الدنيا ما يحلالي
عمري ما فكرت لحظة فيك
ولا مرة خطرتلي على بالي
ويوم لقيتك وجمعنا ربي العالي
وجات عينيا في عينيك
من وقتها وليت محنتي وهبالي

يلي حبيتك وسلمت قلبي ليك
اسأل الليل والعشاق على حالي
يخبروك في حبك اش جرالي
من يوم سحرتني بنظرة عينك
عشقتك وسكنتلي في خيالي
هايمة في حبك نهاري وليلى
وعيوني سهرانة تناجي فيك
نسيتني ونسيتها النوم الغالي

شنوة باش نقلك يا روح قلبي الغالي
غير أسمعني وافهمني وخوذلي بهبالي
متعذبة في غيبتك حتى العسل ما يحلالي
فيك نحيا وفيك نموت
وربي وحدو عالم بحالتي وأحوالي

قلي يا روح قلبي الغالي
زعمة كيفاش نجمتي توصلك
وانت القمر العالي؟
زعمة يجي نهار بمحبتك تصفالي؟
ونحط راسي على زندك ودنيتي تزهالي
ولا مكتوبلي نعيش جرح الهوى
والذكرى الجميلة وحدها تبقالي..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*