نحبّك…ومش باش تفهم معناها… قصيد في الشعر المحكي لنسرين المسعودي

نحبّك مش معناها 
ربحت معايا الطرح 
نحبّك مش يعني تمدّ ساقيك و ترتاح 
تسرح و تغيب و ترجع كالريح 
تزعزع و تنفض و تكسر
و في بالك جدّ عليك 
أنوّ معايا ما تلقى كان سماحي 
كي نقلّك نحبّك غادي وين بدى بلاك 
و غادي وين تطرز شقاك 
محبتي مش وردة 
ضحكة و تعنيقة و يا ناس ماكان باس 
محبتي عركة تتعارك مع كل أطرافك 
إحساسك و ناسك و قياسك
و لباسك و ليلك و صباحك 
كلامك و سكاتك
تخمامك و عينيك و انفاسك
حتى حروف اسمك نلقى فيهم باي… 
نحبّك 
طير و جنّح و اعمل في السما ثنية 
البس مفاصلي و لوّج في تراكني حلمة 
فكّكني و حلني و اربطني

اسرقني من لحافي
من ضبابي من هبالي 
شوف شعري طوال قصار
طايح ذابل شايح 
مواتيني مْحِلّيني و الا مضيَّعْني من مْرَايْتِي
مخبِّيني من ملامحي 
كون الغلاف و الروح
اللي يتقال و الي يتخبى

و الي يتعبّى و الي ما زال ما لقاش وين يدسّ

و يتلزّ و يعارك على بلاصتو و يغرس عروقو

و يسقي نوّارو.  
كون الشمس و القمرة 
النجمة و الهربة و البوسة…
الرعشة و الغصّة و الصّيحة 
الضُّحكة و الفرحة و النغرة و الوحلة 
البِنّة و الحشمة و عرق الجواجي 
كون انا ……
و انت أنا ……
و افهم اش معناها نحبّك


مَتلفِّش الجرَّة
و تِقْلب الهَدْرة
و كي تسرح فيا ما تكابرش
ما تلعباهاش بلا بيا لباس و متفلَّمْش
متفكرنيش بالوقت
بالمكان و بالسوايع و الزْمان
بالعيشة و التُخْمام و الظرف و الظروف
الكدس المحروق و الرماد المنثور
و الحبس المقفول و السجاّن و المعقول
و الي يصير و الي عيب يصير
و الناس و الكياس
و ضحكتي العالية و غيرتي الطايرة
المطرة العايمة 
و بدني الذايب المرخوف وصوتي النّاعس المشجون
تصويرتك … ريحتك …وشعرك 
دخانك… وعينيك… و قليل كلامك 
تعرف اش معناها نحبّك 
صعيب تفهمها

Avatar

عن فتحي جوعو

فتحي بن الطّاهر جوعو، تونسيّ الجنسيّة، من مواليد 1956 بمدينة حمّام الأنف الموجودة في الضاحية الجنوبيّة للعاصمة تونس،متحصّل على شهادة الباكالوريا اختصاص آداب، ومتحصّل على الإجازة في الفلسفة من جامعة دمشق بالقطر السوري، مارس تدريس الفلسفة بالمعاهد التونسيّة طوال ثلاثة عقود ونصف، له كتابات متعددة ومتنوعة في الفكر والأدب والفلسفة والفن. صدر له كتاب: "انفعالات نرسيس، مقاربات فلسفيّة لنصوص جلال المخ الشّعريّة".سنة 2016 وكتاب:" الجسد هو الأصل: قراءة في مفارقات الجسد" سنة 2018 وكتاب:" أزمة المعنى" سنة 2018 وقيد النشر : كتاب " انتفاضات برومثيوس": مقاربات فلسفيّة لكتابات جلال المخ السّرديّة وكتاب" قراءات في الآداب والفنون"

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*