كي نحبّك يا شِسْمِكْ..! قصيد باللهجة المحكية بقلم الشاعرة بثينة هرماسي من تونس.

كي نحبّك يا شِسْمِكْ !


الشّمس في ظلام اللّيل
من حلكتو تُزرقْ ..
وربيع يجي من غير وقت
يتبسّم ..
و يضحكْ ..
كي نحبّك يا شِسْمِكْ ! ..
الصحراء تنوّر
و ينبت فيها الجّرْ …
والنّجمة من السّماء تُزْلقْ ..
كي نحبّك يا شِسْمِكْ ! ..
تنبت جناحات القلبي ،،
والياسمين من وراء لِبْحرْ
يفوح بيك ويعبقْ ..
كي نحبّك يا شِسْمِكْ ! …
نضيَعْ الثنايا اِلْكُلّْ
نْشُقْ لخلاء
وفي محبّْتِكْ
نْبقْبقْ و نُغرقْ ..
كي نحبّكْ يا شِسْمكْ ! ..
قلبي يطيحْ !
تهزّو الرّيحْ ..
ينبت شجرة
وَ اْلاَّ وردة
بِيكْ تفيحْ
كي نحبّك يا شِسْمِكْ !
ننسى طعامي
و ريقِي يشيحْ
كي نحبّكْ يا شِسْمِكْ ! ..
طعم المرّ يولِّي
عسلْ
و قلبي يَقوَى
يولِّي جْبلْ !
كِي نْحِبّكْ يا شِسْمِكْ !..
يضيع كلامي على لساني
وتفنى الدنيا
ولَسَامِي
من قدّامي ،،
وقلبي يفرغْ
وبِيكْ يِتْعَبَّى
كي نحبّكْ يا شِسمكْ !..
موجة تْهِزّْ ..
وموجة تْجيبْ ..
وقلبي يَسْكِرْ ..
يولّي بحرْ !
و بِيكْ يِطفْطفْ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*