بَعْدِ السِّتِّينْ سْلَامْ …قصيد باللغة المحكية بقلم الشاعر عمر سبيكة من تونس.

بَعْدِ السِّتِّينْ،
قُلْتْ نْرَابِي
خِيرْ،
نْطَيِّرِ الْكِلْمَاتْ،
نْطِيرْ،
بَعْدِ السِّتِّينْ،
قُلْتْ خَلِّينِي نْزَابِي،
نْبَدِّلْ اللُّوكْ،
نِفْرَحْ،
نِسْرَحْ،
نِتْسَرَّحْ،
تِتْسَرَّحْ الكِلْمَاتْ
فِي كْلَامِي،
سِتِّينْ عَامْ،
لَعْمُرْ مَاشَى،
مَاشِي،
مَاشِي
بْلَاشِي،
بْلَاشِي جْنَاحْ،
بْلَاشِي صْبَاحْ،
بْلَا حِلْمَهْ،
سِتِّينْ عَامْ،
غَايِبْ،
ذَايِبْ
فِي ضَوْ شَّمْعَهْ،
سِتِّينْ عَامْ
نْطَفِّي فِي الظَّلْمَهْ،
سِتِّينْ عَامْ
ضَايِعْ
فِي شَارِعْ ضَايِعْ،
نْفَارِعْ،
مَانِي طَايِعْ،
مَهْبُولْ،
مَا نْعَدَّلْشِي
عَ اللِّي زَعْمَا زَعْمَا،
وْ عَلِّي زَعْمَا زَعْمَا،
وِ اللِّي يْعَلِّي،
وِ اللِّي يْوَلِّي،
وِ اللِّي يْوَلِّي،
وِ اللِّي وِ اللِّي،
مَهْبُولْ،
مَا نَعَدَّلْشِي
عَ اللِّي طَالِعْ الْفُوقْ،
وِ اللِّي طَايِحْ،
طَايِحْ فِي السُّوقْ،
مَهْبُولْ،
حَافِي عُطْشَانْ،
نْغَنِّي فَرْحَانْ،
بَاقِي نِسْقِي فِي الْوَرْدَاتْ
عمر سبيكة
حمّام الأنف صيف 2020

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*