حسنا بهية … قصيد زجلي بقلم الشاعر بوعلام حمدوني من المغرب.

حسنا علي فاتت
عيونها عسلية
لحواجب منقوشة
وشفار ك لوريدات
الله عليك يا لغزالة
شوفتك ملونة
من ربيع لعوينات
وريح لغرام نسمة
تهب م النظرة
نار شوقي زادت
ب لود مسلحة
وب لهفة واضحة
نابيتها ..
بزين لكليمات
دارت ب سحر
شوفة
تهت ف لحظة
بغيتها و جوارحي
هوات
هي طبيب
ل حزان و لكية
ف هواها
نمشي ب نية
يا حسنا يا زينة
الصفات
جاوبيني ديري
مزية
فهمي الربطة الزغبية
أنت تضوي
الظلمات
ضحكت
و رسمت بسمة
هداتني زين التحية
و بدينا ف حديث
نظرات
ملفوفة ب لحنية
ف لخيال مبنية
و لذيذ الهمسات
م عيونها الندية
تروي لود و لمحبة
و كياني زعزعت
هبت رياح
لغرام ب همسة
بقيت هايم
بين نظرة و نظرة
طاير ف سماوات
من كثرة الفرحة
ننظم ليها
قوافي رومانسية
ليها ذيك البهية
لحسنا لمسرارة
مولات أحسن
التسميات
تضمد لجراح
الدامية
تمحي لماضي
و الخيبة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*