يا صاحبي… بقلم الشاعر على السيد محمد حزين من مصر.

ما كانـ ش العشم يا صاحبي

تستخبى مني , طاب ليه فهّمني

ليه يا صاحبي مخاصمني

وليه يا صاحبي بعدت عني

عملت لك إيه طاب قولي

أنا اشتريتك بالغالي , يا غالي

وأنت بالرخيص تبيعني

**

طاب ما تيجي يا صاحبي نتصارح

ونفتح صفحة جديدة وننسى امبارح

ونتسامح …

ونمد ايدينا لبعض ونتصالح

ما كنا زمان يا صاحبي نتسامح

ونتصارح ونتصالح

وننسى الأسى لبعض

ونرجع حبايب

زي زمان لما كنا حبايب

انت نسيت إن المساح كريم

وصافي يا لبن , حليب يا اشطه

أنا يا صاحبي ما فتكرش في يوم

زمان زعلنا من بعض

**

سلام عليك يا صحبي

سلام علي أيامنا الحلوة

والشجرة والترعة والأرض الواسعة

والكورة الشراب , واللَّمة الحلوة ,

والضحكة الحلوة مع أجمل أصحاب

فاكر يا صاحبي

لما كنا صغيرين , كنا حلوين ,

كنا اتنين طيبين , كنا تيمين ,

كنا توأمين

**

فاكر يا صاحبي لما كنا نروح المدرسة ,

وكنا نلعب ونذاكر مع بعض

نتخاصم ونضحك ونتصالح

وكنا نسامح بعض

نتخانق حبة , وحبة نتصالح من تاني

بس كنَّا ما نبعد عن بعض ثواني

وكنَّا اتنين قريبين قوي من بعض

قلبنا كان علي بعض

وكلامنا كله , وسرنا كان مع بعض

ناكل ونشرب مع بعض

ونسأل علي بعض

نتقابل نسلِّم بحرارة

ولما كنَّا نمشي ايدينا الصغيرة

المتعرقة في ايدين بعض

وفي الشدة نواسي , ونحضن بعض

ونمشي يا صاحبي

وايدينا في ايدين بعض

وكتافنا النونو في كتاف بعض

كنَّا أخين , وكنَّا بنحب بعض

**

فاكر يا صاحبي زمان

بنت الجيران ,

والجوابات الـ بعتناها زمان

والعيد , والسينما ,

وجني القطن ,

يآآه على الأيام الحلوة يا صاحبي

اللي قضيناها مع بعض

كانت أيام يا صاحبي

كانت ايام ……

أقول ايه بس يا صاحبي

ولا أقول ايه ,

**

واليوم بعدت عني يا صاحبي

وخدتك الدنيا مني

صاحبي يا رفيق عمري

وذكرياتي , ودربي

رفيق تختتي وفصلي

عامل إيه واحشني

اشتقت إليك كتير

والله واحشني يا صاحبي

يا ترى فاكرني ,

ولا خلاص نسيتني


تعرف يا صاحبي

لو كان بحور الدنيا مداد

والشجر كل الشجر أقلام

لكان فرغ المداد , والأقلام

وبقي لسه بيني وبينك يا صاحبي

كلام كتير ما ينتهي ..


تمت مساء الاثنين 8/ 2 / 2021

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*