حلو العمر : (زجل) بقلم الشاعر فردوس النجار من سورية.

بتذكُر شو كنت تحبني؟!
بتذكُر شو كنت تطير لما تضبني؟!
بتذكُر شو كنت تزَعفِل حجار الدرب
وبحضن الورود القصار تكْبني؟!
بتذكر عيون الشمس كيف تردّها
وبقلب عبو للصباح تدبني؟!
لمن كنت انت العمر والضو
ولمن كنت سيرة بحر محلو
كانت الموجة ترقص وتقصع
وكان الحكي صغران ما بيوسع
وعالسكت نرسم بلسم القصة
وعالسكت نتهرَّب من الغصة
نربت عكتف الليل حتى ينام
ونلبِّس قصور الحلم هندام
نغني نهيِّص نضحك علينا
نلفلف طرف غيمة ع ايدينا
وهونيك بيسابع سما نوقف
ونحط للعاشق الف موقف
نمسك بشال الكوكب السيار
نتحركشو تيهرهر الاخبار
ويحلف ب الله وعينو محمرة
انو الدني لولا العشق مُرة
واني عزندك صرت سبع فصول
اسرح عكل الكون عرض وطول
ومن كتر ماكان الهنا جنونك
ومن كتر ما تقّلت بفنونك
دبت بسواقي الحب بعد التلج
وفَتَّح عصدري كل ورد المرج
وقلبي النهر والشوق فيك يغبّني
بتذكُر شو كنت تحبني؟!
*** *** ***
دمشق : فردوس النجار

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*