ما في عَتـَبْ: (زجل) بقلم الشاعرة فردوس النجار من سورية.

والله اجتمعتوا يا عَرَب ْ!!
والله ومشي المحظور !!
واسم الله بَرَّمْتوا الشنب .. وعلقتوا بالناطور !!
هَيْ مرحلة ْ (ما في عتب) ..وعالمهزلهِ مَقدور !!
والدمْع من عيني نـَضَب ..ما في حدى معذور !!………..
يا وطن عا كف الزمن: تاهِتْ أصابيعو .. صلبوك بيأرخص ثمن..اللي بيظلمَكْ بيعو !! هلال وصليب تشابكوا.. قولوا لِنا وذيعوا.. إنو الوصال بْ هالبلد…َمـلـِّينا تقطيعو !! الغربال ما خَلا حَدا..صرنا الهدف والنار
بالك علينا يا قدر من شي بحر غَدَّار..
تاهت مراكبنا عمر…والحكي دمو فار
القبطان وَلـَّفني وسْكِرْ..
والكذب ملحو صار
عينو على دمي وأنا ..
عيني على السُّمَّار
وقعدنا بينفس القـْدْر..
نغلي وأملنا احتار
بكرى اشتكى ..وقلبو بكي.. وتوسَّعِتْ شُعبو قال الحقيقة تـْمَز َّقِتْ.. وبرواحنا لعبوا وصارت ْ بيادرنا عَفـَنْ.. مَلـُّوا الشتي وتـْعبوا والورد ما عَدْلو إسم … ووراقنا لهبوا . ناشف جبينك يا شمس !! يَلـِّي استحوا غلبوا !! نجم الصبح ما عَدْ مَرَق .. وقمارنا انسلبوا !! فوق المجرة تـْمرَّغتْ …يا وطن بجراحك .. تا يلمَحَكْ ملح الزمن…ويْسَكـِّتْ نـْواحَكْ هونيك بابك يا وطن …
وحَدِّ القمر ساحَك…
وجْهَكْ فراتْ وشِفـِّتـَكْ… ما داقت قـْداحَكْ !
_نحنا عَجينةِ من الوفا ..
عم تنطـُرْ فـْرَاحَكْ..
ونحنا إذا جار الزمن …خرطوشة سلاحَكْ !!
كفكِفْ دمعنا يا وطن…يا ضيعةِ الياقوت
يَلـِّي نـَطـَرْلـَكْ خـَيبـِتـَكْ..
يبلى وبـِقـَهْرو يْموتْ
وتبقى على جبيني قـَسَمْ..
وتـْهْديه ورقة ْ توتْ
ويبقى كـَلامَكْ من صخِر..
تـْعَمِّرْ عـَ راسو بيوتْ


دمشق: فردوس النجار

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*