أيّـــــام زمــــــان ** [ بالعامّيّة التّونسيّة ] بقلم الشاعر محمد الزواري من تونس.

وينك يا أيّام زمان
عطرك ضاع عليّ
وينو فلّك و الرّيحان
و نوّار عشيّة


وينو عطر ورودك لمّا
نتلمّو في الدّار
وين الضّحكة وقت اللّمّة
لكبار مع صغار
و دعاكم يا بابا و يمّا
يردّ الظّلمة أنوار
يمحي من ضلوعي الغمّة
و يفتح ألف ثنيّة


وين غناياتك و كلامك
مالوفك الحنين
و نغمتك تكتبها اقلامك
سيكا و الحسين
نغنّي في طبعك و مقامك
يا ليلي يا عين
و اليوم هجرنا أنغامك
و الدّمعة ف عينيّ


وينك يا أيّام زمان
رجّعني في صغري
و الدّنيا ألوان ألوان
مهما العمر يجري
مرسومة بريشة فنّان
و كلمتها من شعري
و تخلّي قلبي مطمان
لمحبّة و النّيّة

** محمّد الزّواري ـ تونس **

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*