مِيلاد 2019… بقلم الشاعر ميشال سعادة من لبنان.

     ألْفَينْ عامْ

     وْكَمْ سِني

     بَشَّرْ ملاكِ الرَّبْ مَرْيَمْ

     وْقَلاَّ :

     حَامِِلْ يا عَدْرَا

     بْ يَسُوعْ

     إبْنُو لَ اللَّهْ

     يَلْ حَبّْ يِخْلَقْ

     مِتِلْ كِلْ النَّاسْ

     بِتْيَابْ مَا لِبْسَا

     فَقِيرْ

     بِمْغارَهْ حَقِيرَهْ

     وْمِزوَدْ حَقِيرْ

     لَ لْحَافْ فِيهَا

     وْلَا سْرِيرْ

     شَلَّعْها الشِّتِي

     وِالرِّيحْ

     دَحْرَجْ حْجَارَا

     وْدَنَّقُو مْنِ البَردْ

     بَقْراتْ وِقْرَاقِيرْ

     أَنْفَاسُنْ

     ما أَطْيَبَا

     دَفِّتْ جِسِمْ

     هَ الطِّفلْ الزْغِيرْ  !

                                    ****

     يَسُوعْ !

     رَبِّي

     ليشْ خْلِقِتْ هَيكْ ؟

     دَنَّقُو مْنِ البَردْ

     إجْرَيكْ

     إيدَيكْ

     وْإمَّكْ وْيوسفْ

     قَلْبُنْ عْلَيكْ

     ليشْْ دَخْلَكْ ليشْ

     لا بَيتْ لا تَختْ

     لا سْرِيرْ

     عَتمْ وْشِتِي وْلَيلْ

     لا تْيَابْ

     لا مْشَالِحْ حَرِيرْ !!

     وِسْمَعِتْ صوتْ

     قَلِّي :

         صَلّـي يا إِبْنِي

         مَعِي صَلِّي

         تَ الْكَوْنْ يِتْجَلَّى

         بْإِيمَانْ وِمْحَبِّي

         وَحدَا الصَّلاَ هيِّي

         دَربَكْ وْدَربِي

         بْإِيَّامْ هَ القِلِّي !

                                    ****

     وْإِنْتِ يا مَرْيَمْ

     إمّ أَللَّه

     يَا إِمِّي !

     شو بْحِبْ إِرْكَعْ قْبَالِكْ

     رَتِّلْ وْصَلِّي

     وْقِلِّكْ يَا مَاشَاللَّهْ

                                    ****

     وْشُو بْحِبْ

     مَرْمِغْ جْفوني عَ إيدَيْكِ

     وْعَ كْعابْ إجريكِ

     يَمّْ الكَونْ

     وِالأَرِضْ كِلَّا

     وْشُو بْحِبْ

     لَمْلِمْ خْيَالِكْ

     المَزْروعْ هَونْ

     وْهَونْ

     وْضَلّْ عَقْبالِكْ

     إطْلُبْ تْضَلِّي

     لْ إمّْ يَ لْ بِتْلِمّْ

     تِغْمُرْ وْلادَا

     غمْرَا وَرَا غَمْرَا

     تَ الْسَّلامْ يْعِمّْ

                                    ****

    ميشال سعادة    24/12/2019

L’image contient peut-être : feu, nuit et nourriture

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*