آه يا دنيا..! بقلم الشاعر على السيد محمد حزين من مصر .

وأخرتها إيه معاكي يا دنيا

بتعدلي وتقلبي كده معايا

في ثانية

خاينة وغدارة

ولا ليكي أمان

بتدي اللي مش عاوز

وبتحرمي الغلبان


واللي متغطي بيكي يا دنيا

متغطي لكن عريان

واللي يتدارى فيكي خاين وجبان

كلمة وقالوها أهل زمان

ما بتيجي يا دنيا إلا على الغلبان

وأنا وأنتِ يا دنيا

أنا وأنتِ والزمان


أنا مش فارقه قوي معايا

تلعبي عليا أو تلعبي ويَّايا

تضحكِي تكشري

تفرحيني وتبيتيني زعلان

دمعتي على خدي

ملكيش يا دنيا أمان


بس نصيحة مني ليكي يا دنيا

بلاش تيجي بالقوي علي الغلبان

ولو حبيتي تغدري

وتبيعي يا دنيا

بلاش تبيعي بأرخص الأثمان

وبيني وبينكِ يا دنيا حكم الزمان

الزمان , الزمان ,

حكمة وقالوها أهل زمان

ما بتيجي إلا على الغلبان

ما لكيش يا دنيا أمان

ما لكيش يا دنيا أمان


تمت مساء الاثنين / 22 / 2 / 2021

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

*